കേരള വിതരണാവകാശം സ്വന്തമാക്കി പനോരമ സ്റ്റുഡിയോസും സെഞ്ച്വറി ഫിലിംസും; ‘ടോക്സിക്’ ഓഗസ്റ്റ് 26ന് തിയറ്ററുകളിൽ
യഷ് നായകനാകുന്ന ഏറെ പ്രതീക്ഷയോടെ കാത്തിരിക്കുന്ന ചിത്രം ‘ടോക്സിക്: എ ഫെയറി ടെയിൽ ഫോർ ഗ്രോൺ-അപ്സ്’ കേരളത്തിൽ പനോരമ സ്റ്റുഡിയോസും സെഞ്ച്വറി ഫിലിംസും ചേർന്ന് വിതരണം ചെയ്യും. ഓഗസ്റ്റ് 26ന് ലോകമെമ്പാടുമുള്ള തിയറ്ററുകളിൽ റിലീസ് ചെയ്യുന്ന ചിത്രം ഈ വർഷം ദക്ഷിണേന്ത്യൻ സിനിമയിൽ നിന്നുള്ള ഏറ്റവും വലിയ തിയറ്റർ റിലീസുകളിലൊന്നായാണ് വിലയിരുത്തപ്പെടുന്നത്.
‘കെജിഎഫ്: ചാപ്റ്റർ 2’ന് ശേഷം യഷ് വീണ്ടും ബിഗ് സ്‌ക്രീനിലെത്തുന്ന ചിത്രമാണ് ‘ടോക്സിക്’. പനോരമ സ്റ്റുഡിയോസിന്റെ ദക്ഷിണേന്ത്യയിലെ വിപുലീകരണത്തിന്റെ ഭാഗമായാണ് സെഞ്ച്വറി ഫിലിംസുമായുള്ള കേരള വിതരണ പങ്കാളിത്തം. യഷിന്റെ മോൺസ്റ്റർ മൈൻഡ് ക്രിയേഷൻസും കെവിഎൻ പ്രൊഡക്ഷൻസും ചേർന്നാണ് ചിത്രം നിർമ്മിക്കുന്നത്. ഗീതു മോഹൻദാസ് സംവിധാനം ചെയ്യുന്ന ചിത്രത്തിൽ യഷിനൊപ്പം കിയാര അദ്വാനി, നയൻതാര, ഹുമ ഖുറേഷി, താര സുതാരിയ, രുക്മിണി വസന്ത് എന്നിവർ പ്രധാന വേഷങ്ങളിലെത്തുന്നു.
പഴയകാല ഗോവയുടെ പശ്ചാത്തലത്തിൽ കഥ പറയുന്ന ‘ടോക്സിക്’ അധികാരം, കുറ്റകൃത്യം, അഭിലാഷം, വഞ്ചന തുടങ്ങിയ പ്രമേയങ്ങളിലൂടെയാണ് സഞ്ചരിക്കുന്നത്. മാറിമറിയുന്ന ബന്ധങ്ങളും അപകടകരമായ സാഹചര്യങ്ങളും അഭിമുഖീകരിക്കുന്ന റായ എന്ന കഥാപാത്രത്തെയാണ് യഷ് അവതരിപ്പിക്കുന്നത്.
ദക്ഷിണേന്ത്യയിൽ നിർമ്മാണം, വിതരണം, തന്ത്രപ്രധാനമായ പങ്കാളിത്തങ്ങൾ എന്നിവയിലൂടെ സാന്നിധ്യം ശക്തമാക്കുകയാണ് പനോരമ സ്റ്റുഡിയോസ്. മലയാളത്തിൽ ‘അനോമി’, ‘ഉന്മാദം’, ‘ടിക്കി ടാക്ക’ തുടങ്ങിയ ചിത്രങ്ങൾ പനോരമ സ്റ്റുഡിയോസിന്റെ പ്രൊഡക്ഷൻ സ്ലേറ്റിലുണ്ട്. ടൊവിനോ തോമസ് നായകനാകുന്ന ‘പ്രൊഡക്ഷൻ നമ്പർ 4’യും ‘മുൻപേ’യും നിലവിൽ നിർമ്മാണ ഘട്ടത്തിലാണ്. ഫഹദ് ഫാസിൽ ഉൾപ്പെടെയുള്ള പ്രമുഖ മലയാള സിനിമാ താരങ്ങളുമായും പനോരമ സ്റ്റുഡിയോസ് തന്ത്രപ്രധാനമായ സഹകരണങ്ങളിൽ ഏർപ്പെട്ടിട്ടുണ്ട്.
കേരളത്തിൽ യഷിനുള്ള ശക്തമായ ആരാധക പിന്തുണ, ചിത്രത്തിന്റെ വമ്പൻ കാൻവാസ്, ശ്രദ്ധേയമായ താരനിര, ഗീതു മോഹൻദാസിന്റെ വ്യത്യസ്തമായ കഥപറച്ചിൽ എന്നിവ ‘ടോക്സിക്’നെ സംസ്ഥാനത്തെ പ്രധാന തിയറ്റർ ആകർഷണങ്ങളിലൊന്നാക്കി മാറ്റുമെന്നാണ് പ്രതീക്ഷിക്കുന്നത്.
ഓഗസ്റ്റ് 21 മുതൽ അഡ്വാൻസ് ബുക്കിങ്
ലോകമെമ്പാടുമുള്ള റിലീസിന് മുന്നോടിയായി ചിത്രത്തിന്റെ പ്രമോഷൻ അവസാനഘട്ടത്തിലേക്ക് കടന്നിരിക്കുകയാണ്. യഷ് പ്രത്യക്ഷപ്പെടുന്ന പുതിയ പോസ്റ്ററും അണിയറപ്രവർത്തകർ പുറത്തിറക്കി. തീപാറുന്ന ചുവപ്പ് പശ്ചാത്തലത്തിൽ തീവ്രമായ ലുക്കിലാണ് പോസ്റ്ററിൽ യഷിനെ അവതരിപ്പിച്ചിരിക്കുന്നത്.
ഓഗസ്റ്റ് 21 മുതൽ ‘ടോക്സിക്’ന്റെ അഡ്വാൻസ് ബുക്കിങ് ആരംഭിക്കും. ഓഗസ്റ്റ് 26ന് ലോകമെമ്പാടുമുള്ള തിയറ്ററുകളിലെത്തുന്ന ചിത്രത്തിനായുള്ള പ്രേക്ഷകരുടെ കാത്തിരിപ്പിന് പുതിയ പോസ്റ്ററും അഡ്വാൻസ് ബുക്കിങ് പ്രഖ്യാപനവും ആവേശം പകരുകയാണ്.
