കൊച്ചി: സിനിമാപ്രേമികൾക്കായി വീണ്ടും ഒരു ഭംഗിയാർന്ന അന്താരാഷ്ട്ര വേദി ഒരുങ്ങുന്നു. ഏപ്രിൽ 28-ന് കൊച്ചിയിലെ ഗോകുലം കൺവെൻഷണൽ സെന്ററിൽ വച്ച് നടക്കാനിരിക്കുന്ന രണ്ടാം LK ഇന്റർനാഷണൽ ഷോർട് ഫിലിം ഫെസ്റ്റിവൽ ശ്രദ്ധേയമാകുന്നു.
ഈ വർഷത്തെ ഫെസ്റ്റിവലിന്റെ ക്രിയേറ്റീവ് ഡയറക്ടറായി ചുമതലയേറ്റിരിക്കുന്നത് വൈബ് ഓൺ ഗ്ലോബൽ ഗ്രൂപ്പ് ചെയർമാനും, പാൻ-ഇന്ത്യൻ നടനുമായ വിയാൻ മംഗലശ്ശേരിയാണ്. അദ്ദേഹത്തിന്റെ നേതൃത്വത്തിൽ, കലയും സാങ്കേതികവിദ്യയും ഒരുമിക്കുന്ന പുതിയ തലമുറ ചലച്ചിത്ര അനുഭവം പ്രേക്ഷകർക്ക് സമ്മാനിക്കാനാണ് സംഘാടകർ ലക്ഷ്യമിടുന്നത്.
ആറ് പ്രധാന കാറ്റഗറികളിലായി ഇന്ത്യയിലും വിദേശത്തുനിന്നുമായി ലഭിച്ച 1200-ത്തിലധികം ചിത്രങ്ങളിൽ നിന്ന്, 16 അംഗ അന്താരാഷ്ട്ര ജൂറി സംഘം തെരഞ്ഞെടുത്ത മികച്ച ചിത്രങ്ങൾക്കാണ് വേദിയിൽ പുരസ്കാരങ്ങൾ നൽകുക. വിജയികൾക്ക് ലക്ഷക്കണക്കിന് രൂപയുടെ സമ്മാനങ്ങളും അംഗീകാരങ്ങളും കാത്തിരിക്കുന്നു.
മലയാള സിനിമയുടെ ഇതിഹാസ സംവിധായകൻ അടൂർ ഗോപാലകൃഷ്ണൻ ഫെസ്റ്റിവലിന്റെ പാട്രണായും, പ്രശസ്ത സംവിധായകൻ കമൽ ജൂറി ചെയർമാനായും സേവനം അനുഷ്ഠിക്കുന്നു. LK ഗ്രൂപ്പ് ചെയർമാൻ രാജേഷ് പുത്തൻപുരയിൽ ആണ് ഫെസ്റ്റിവലിന്റെ ഡയറക്ടർ.
ഈ വർഷത്തെ പ്രത്യേകതയായി, ഇന്ത്യയ്ക്ക് പുറമെ ജമൈക്ക, ഇറാൻ, സിംഗപ്പൂർ തുടങ്ങിയ രാജ്യങ്ങളിൽ നിന്നുള്ള പ്രമുഖ ജൂറി അംഗങ്ങളും പങ്കുചേരുന്നു. അന്താരാഷ്ട്ര നിലവാരത്തിൽ സിനിമകളെ വിലയിരുത്തുന്ന ഈ വൈവിധ്യമാർന്ന ജൂറി പാനൽ, ഫെസ്റ്റിവലിന്റെ ഗൗരവം കൂടുതൽ ഉയർത്തുന്നു.
ചലച്ചിത്ര ലോകത്തിന്റെ പുതുമകളും സൃഷ്ടിപരമായ
കഴിവുകളും ഒരുമിച്ച് ആഘോഷിക്കുന്ന ഈ വേദി, കൊച്ചിയെ വീണ്ടും ഒരു ഗ്ലോബൽ സിനിമാ ഹബ്ബായി മാറ്റുമെന്ന് പ്രതീക്ഷിക്കുന്നു.
- പി ആർ ഓ – എം കെ ഷെജിൻ
