തിരുവനന്തപുരം: ഈ വർഷത്തെ മികച്ച ഗാനരചയിതാവിനുള്ള ‘പൂവച്ചൽ ഖാദർ പുരസ്കാരം’ പ്രശസ്ത ഗാനരചയിതാവ് വിനായക് ശശികുമാറിന് സമ്മാനിക്കും. പൂവച്ചൽ ഖാദർ കൾച്ചറൽ ഫോറം ഏർപ്പെടുത്തിയ ഈ വർഷത്തെ സിനിമ-സീരിയൽ-മീഡിയ അവാർഡുകളുടെ പ്രഖ്യാപനത്തിലാണ് വിനായക് ശശികുമാറിനെ പുരസ്കാര ജേതാവായി തിരഞ്ഞെടുത്തത്.
മലയാള ചലച്ചിത്ര ഗാനശാഖയിൽ തന്റേതായ വ്യക്തിമുദ്ര പതിപ്പിക്കാൻ വിനായക് ശശികുമാറിന് സാധിച്ചിട്ടുണ്ട്. ‘ആശാൻ’ എന്ന സിനിമയിലെ ‘കുഞ്ഞിക്കവിൾ മേഘമേ…” എന്ന സൂപ്പർഹിറ്റ് ഗാനമാണ് വിനായകിനെ അവാർഡിനർഹനാക്കിയത്.
പൂവച്ചൽ ഖാദറിന്റെ അഞ്ചാം ഓർമ്മദിനമായ ജൂൺ 22, തിങ്കളാഴ്ച വൈകിട്ട് 5.30-ന് തിരുവനന്തപുരം വൈലോപ്പിള്ളി സംസ്കൃതി ഭവനിൽ വെച്ച് നടക്കുന്ന വർണ്ണാഭമായ ചടങ്ങിൽ പുരസ്കാരങ്ങൾ വിതരണം ചെയ്യും. കലാ-സാംസ്കാരിക-സാഹിത്യ-രാഷ്ട്രീയ രംഗത്തെ പ്രമുഖ വ്യക്തിത്വങ്ങൾ ചടങ്ങിൽ സംബന്ധിക്കും.
